Skip to content Skip to sidebar Skip to footer

Turiturian ni Toga Purba sahat tu Raja Sigulangbatu

 
Turiturian ni Toga Purba sahat tu Raja Sigulangbatu
Turiturian ni Toga Purba sahat tu Raja Sigulangbatu. Foto: Pulau Simamora dilihat dari Desa Tipang.
Horas..! Baliga ma binaligahon, barita ma binaritahon..

Adong do sada turiturian ni angka natuatua najolo taringot tu Raja Sigulangbatu, alana mangihuthon turiturian i dohot tona ni angka natuatua tu na umposo didok nasida Datu Bolon do Raja Sigulangbatu. Anggo hahana na sihahaan ima Pantomhobol, sai holan marburu do ibana jotjot, jala sai godang do dapot ibana hasil ni buruanna. Di na marburu ibana Pantom do dibaen songon sinjatana, ima tarsongon hujur. Jadi alani i gabe digoari ma ibana Pantomhobol, ima anak sihahaan ni Toga Purba.

Anggo sipaidua, dang pola olo on mula ulaon. Antar songon na malas do ninna ibana, alani gabe sai holan na marmahan horbo ma ibana. Didok angka turiturian i, parhorbo na utusan do ninna najolo ompunta Toga Purba, jadi sai holan horbo ni amongna on ma diparmahan ibana, gabe dibahen ma goarna Parhorbo.

Anak ni Toga Purba nomor tolu, ima siampudan na manja do halakna. Ala anak siampudan, gabe lomolomo nion do tu hahana na dua i. Molo manang mahua ibana, pintor ro do ompunta Toga Purba mamuruki hahana na dua on, jadi gabe sai holan na marmeami ma ibana. Dung hirahira marsiajar dolidoli ibana, sian naso pamotoan ni amana ompunta Toga Purba laho do ibana marguru hadatuon tu angka datu di nahumaliang hutana, ima huta Tipang di topi ni Tao Toba jonok tu Bakara, ala disi do huta ni Raja Sumba, ima ompung ni Toga Purba. Dua do natoras ni Toga Purba na marhaha maranggi, Toga Simamora ma siahaan, jala Toga Sihombing ma siampudan. Alai molo diparparibanon gabe Toga Sihombing do sihahaan ala jumolo ibana mambuat boru ni Lontung. Dung monding Toga Sihombing, dihabia Toga Simamora ma muse na hinahabaluhon ni Toga Sihombing. Tubu ma anakna tolu, ima Toga Purba, Toga Manalu dohot Toga Debataraja (na mamompar marga Simamora).

Turiturian ni Toga Purba sahat tu Raja Sigulangbatu
Pulau Simamora di Tipang, Bakkara - Humbang Hasundutan.
Mulak muse hita tu turiturian ni Raja Sigulangbatu. Jempek hata dohonon, ala sai holan na marguru ninna Raja Sigulangbatu, pola sampe dohot marguru ilmu tu begu dohot babiat, gabe datu bolon ma Raja Sigulangbatu. Alani hadatuonna on, gabe sai holan mardalani ma ulaonna jala martanding hadatuon dohot marjuji. Alai ganup marjuji ibana, sai holan na talu, dang hea monang. Gabe sai ro ma angka partunggu tu jabu, hinorhon ni i gabe sai marsak ma amangna ompunta Toga Purba marnida pangalaho ni Raja Sigulangbatu. Molo ro partunggu tu jabu, gabe sai digarari amangna ompunta Toga Purba ma utang ni Raja Sigulangbatu on. 

Dung marujung ngolu ompunta Toga Purba, dang adong be manggarari utang ni Raja Sigulangbatu, gabe mardapotdapot ma parutanganna alani na talu marjuji. Jadi angka parutanganna on pe nunga tung mansai loja dibahen ibana jotjot mulak balging laho martunggu utang ni Raja Sigulangbatu, alai sai holan janji tu janji do dibahen ibana. Alani gabe marpungu ma sude angka parutanganna on rap ro nasida laho martunggu tu Raja Sigulangbatu. Ala dang targabusi Raja Sigulangbatu be nasida sude, ujungna didok ibana ma tu angka parutanganna i, ninna ma:

"Dihamu angka damang, lae dohot sude hamuna, ia taringot tu utangku tu hamuna pasti do gararonhu, alai dang marhepeng ahu. Jadi alani i ba horbokku na di dolokdolok an ma hubaen gararna tu hamuna." Ninna huhut dipatudu Raja Sigulangbatu horbo ni Parhorbo na manggagat di dolokdolok.

"Ba molo na gabe horbo do lehononmu garar ni utangmi, ba hami pe jaloonnami do i." Ninna angka parutangana on. 

"Ima, jadi paima hamu ma di toru ni dolok an, asa hulele horboi tu toru. Tangkup hamu ma, jala boan hamu mulak songon garar ni utangku tu hamuna." Ninna Raja Sigulangbatu papos roha ni angka parutanganna on.

Jadi marbubur ma angka parutanganna on laho tu toru ni dolok i, marsiadu ma nasida asa jumolo sahat, ai didok roha ni angka parutangan ni Raja Sigulangbatu on, manang na ise na jumolo sahat pintor parjolo ma i dapotan horbo. Hape dung pungu sude nasida ditoru ni dolok i, dibahen Raja Sigulangbatu ma hadatuonna, di buhar ibana ma angka batu na bolonbolon sian ginjang ni dolok i marurus tu toru, laos manipa sude angka parutanganna i, gabe mate ma sude parutangannai di tipa batu na diguling ni Raja Sigulangbatu sian ginjang, jala utang ni Raja Sigulangbatu pe gabe sae ma sude, alana nunga mate parutanganna i.

Dijonoki Raja Sigulangbatu ma angka bangke ni na mate i, pintor marsisir ma imbuluna, ngeri dibereng ibana parmate ni angka parutanganna i, sadar ma ibana nunga sala na binahenna i. Sai dirimangi ibana ma parmate ni angka parutanganna i, ala dang tarpikkiri ibana be sasudena na masa i, gabe marsoara na gogo ma ibana dompak ginjang, marjanji tu dirina na so jadi be ulahononna juji sahat tu angka pinomparna, ninna ma: "Mulai sadarion, manang ise sian pomparanhu na olo mangulahon juji, ingkon buharonku ma ibana songon parbuhar ni angka bangke dohot mudar na durus on." Ninna ibana, huhut ma ditinggalhon angka bangke na marpeahan di toru ni angka batu i. Jadi alani i, gabe digoari ma ibana Raja Sigulangbatu.

Mangihuthon baritana sahat tu tutiturian ni Raja Sigulangbatu, molo binereng tu nuaeng on, godang do sian hita angka pomparanna na gabe susa ngoluna molo diulahon juji. Dang na holan sada manang dua be binereng songon buktina, nunga godang. Jadi pinangido tu angka generasi muda, asa unang sai diulahon be marjuji tu angka ari na naeng ro. Sintong manang na sala janji ni Raja Sigulangbatu, ba tong do porlu rimanganta demi kebaikan ni ngolunta be di angka tingki na mangihut.

Jadi mangihuthon baritana, hadatuon Raja Sigulangbatu tu pahompuna Somalate do dipaturun, jala dipaturun ma muse tu gellengna ima Datu Parulas dohot Datu Parultop. Halak on na dua pe, gabe sai tong do holan na mardalani ulaonna martanding hadatuon sampe sahat tu Simalungun, Karo dohot na humaliangna, jala tangkas do taida angka pinompar ni Datu Parulas dohot Datu Parultop marserak mulai sian bona pasogit sahat tu Simalungun, Tanah Karo dohot na humaliangna. Mauliate..

Post a Comment for "Turiturian ni Toga Purba sahat tu Raja Sigulangbatu"