Surat Lamaran Ni Si Lomo

Surat Lamaran Ni Si Lomo

Adong ma donganhu sakamar tingki marindekos di Padang Bulan Medan Taon 1986 na margoar si Lomo. Alai ndang si Lomo anggi ni abangna naso marna tammat marguru malua i. Anggo si Lomo on jogian ma sian hami sude angka donganna, alai parila tu anakboru. Pintor mangirput do on molo pola digoit namarbaju gontingna.

Sai dibenterbenter ibana ma sahalak mahasiswi Jurusan Farmasi. Di bariba ni kampusnami, Fakultas Teknik, kampusna. Hape nian paribotoonhu do itoan i. Samarga au dohot among ni itoan i. Bagak do ibotomi, sai ninna si Lomo on ma tu au di kamar kos. Ai sai tu ito si Mawan i do lohot rohana arian borngin. Binoto ma i, ala sakamar do hami, rap mangalompa, rap balanja tu Kampung Susuk manang tu Pajak Sore. Rap marminggu tu GKPI Padang Bulan. Aha pe dihatai hami nadua, tong do taringot ito si Mawan ujungna.

Sai dielekelek si Lomo ma au asa olo au manurat surat lamaran tu si Mawan. "Surathon ma jolo satongkin, Lae. Naso huboto do manurat surat lamaran. Au pe mangalompa dohot manunsi piring dohot mangapel kamar saminggu on. Pokotna sitau na tenang ma ho," ninna ibana.

"Na rintik do huroha ho. Boha do bahenonhu manurat surat cinta tu ibotonghu. Samarga hami. Nda jolma naso maradat ma au molo husurat surat lamaran tu ibotonghu?" Ningku ma nian, huhut geok huhilala.

"Ai so Lae na bercinta. Au do. Holan na manurathon sajo do Lae. Hatanghu do surathononmu, ndang hatam."

"Ba surathon ma hatami! Aha pola maol ni i. Paboa na jatu sinta ho tu ibana. Boasa pola sahatsahat i tu au ibotona? I pe naung burju do au tu ho. Huloas ho naeng manghalleti ibotonghu."

Alai sai dielekelek ibana ma au da marulakulak. Didampoldampol ibana ma tanggurunghu. Jala didok ibana dua minggu on ripe na tenang ma au ndang mangalompa ndang manunsi piring. Gabe huolohon ma pangidoanna i.

Dituhor ibana ma sada harotas bunga na angur. Dilehon ibana tu ahu asa hukarang surat cintana. Risirisi ma huhilala tingki manurat hata holong ni si Lomo tu itoan i. Hulupahon ma jolo satongkin, hira naso mariboto hami.

".... Ito Mawan, nauli.... situtu hata on, na sai tu ho lao rohanghu dung hutanda ho.... Ndang tartabunihon au be lomo ni rohanghu na holan tu ho arian borngin manogot dohot botari. Asa unang ditulak ho hata on sian rohanghu parbagasan na mansai bagas...."

Hira songon i ma hatahata na husurat hatiha i. Dung hupasidung surat i, didok ibana ma na mansai uli surat i. Pas, pas, ninna ibana. Jala hulehon ma tu donganhu, si Sudung, sakomplek ni si Mawan, asa dipasahat ibana surat i tu ito si Mawan. Tontu ndang tarbahen au molo au sandiri pasahathon surat lamaran ni dongan tu ibotoniba.

Ia si Sudung, alealehu do on sian SD hami. Sahat tu SMP dohot SMA. Sahat tu kulia hami di USU tong do rosu pardonganonnami nang pe marasing fakultas. Jurusan Farmasi do tong si Sudung di MIPA USU.

"Lehon Lae ma jolo surat ni si Lomo on tu si Mawan. Unang adong donganna na mamereng," ningku tu si Sudung jala diolohon ibana.

Salpu ma saminggu. Hudongani ma ibana martandang. Dijou si Sudung ma si Mawan. Pajumpang bohi ma si Lomo dohot si mawan di malam Minggu i. Hundulhundul ma nasida nadua di toru ni bona ni balimbing. Hami nadua pe dohot lae si Sudung lao ma hami tu lapo tes, naso apala dao sian i, huhut manonton TVRI, artis safari. Alai ndang sadia leleng nunga ro si Lomo mandapothon hami nadua, jala itoan i pe nunga masuk tu kamarna. Jempek hata dohonon, ba mulak ma hami sian i. Ndang main si Lomo.

Sai disungkun ibana ma au boasa ndang marna ro balos ni suratna i. Gabe tamba ma ulaonhu laho manungkun si Sudung. Si Sudung pe gabe tamba karejona laho manungkun si Mawan. Alai tuani ma, ujungna ro do balos ni surat i dung tolu minggu salpu.

Dijaha si Lomo ma surat i. Dipotik ibana ma kamar laho manjaha surat i. Di duru ma au hundul huhut mamiltikmiltik gitar. Minar ma huida bohina dung ro ibana sian kamar i, dung sidung manjaha balos ni surat i. Naung dijalo do huroha holong ni rohana i.

Di Malam Minggunai muse lao ma hami tu komplek ni si Mawan. Disi do si Sudung. Hupadomu hami ma nasida nadua di bona ni balimbing i. Alai paganjaghu anno paboaon, ai tong do sumpol. Pintor ditadinghon si Mawan do ibana. Ndang diboto lae on marhata tubu, manang basabasi. Pintor hallang do huroa dilana molo di lambung ni namarbaju.

Marsak ma hami nadua dohot si Sudung. Disipaki ibana ma botol aqua na peak di alaman i. Jut rohana marnida si Lomo. Ai tutu na sahuta do hami natolu: au, si Lomo dohot si Sudung.

Ditogu lae si Sudung ma tanganhu asa dao sian si Lomo. Dihusiphon ibana ma hatana tu ahu: "Rahasianta ma on, Lae. Unang pola diboto lae si Lomo lombang an...."

"Ai aha i, Lae? Boasa pola adong rahasia di hita?" Ningku ma nian da.

"Ai boti. Balos ni surat ni si Lomo i.... au do na manurat i, pangidoann ni si Mawan. Pambahen ma disi ito, ninna si Mawan tu au."

Gabe margak ma au da. "Ba jadi ndang si Mawan hape na manurat surat i? Hape poang nunga melayang-layang roha ni si Lomo manjahasa. Hatam do hape."

"I do Lae. Unang diboto si Lomo," ninna ibana. Jala hudok ma muse hatanghu tu si Sudung:

"Ai surat ni si Lomo i pe....au do manurat i. Ba dia ma diboto si Lomo manurat surat cinta."

Margak muse si Sudung. "Hita do hape na bercinta di bagasan surat, Lae.. Hahaha..."

***

Oleh : Pa Ray Lumbanraja

Share :