Torsa Sambolus, Tokke Sangge-sangge

 
Torsa Sambolus, Tokke Sangge-sangge
Torsa Sambolus, Tokke Sangge-sangge
Ise na so mananda Nai Pardomuan molo di Pasar Pagi, Parluasan - Siantar, holan didok pe parsanggesangge nunga sude mananda i. Tung ise pe disungkun disi, parbessa, tukang sorong, pareman, supir motor dohot partigatiga lampet pe disungkun ingkon mananda parsanggesangge.

Nunga tolu pulu taon Nai Pardomuan martigatiga, sian mamuhai marrumatangga nunga martigatiga ibana di Parluasan. 

Mulana i martigatiga lasiak do nian ibana, alai i ma huroha laos songon dai ni lasiak na siak i do diae ibana na martigatiga lasiak i. Sipata do dihabanghon hatop tu ginjang argana, alai olo tompu madabu tu toru, so sundat muse nauraan moru boratna ala ura malos. Sude i mambahen harugian ma ujungna.

Dipahosing nasida martigatiga pege, alai tong so marhasoan. Angka tokke pege sigodang hepeng sian Saribu Dolok dohot sian Kabanjahe na olo sipata paturunhon arga ni pegena asal ma gojap donganna, ima alona. Dumping harga ninna malo goarna. Ujungna parmodal na saotik songon Nai Pardomuan, monjap ma i ala so mangalo arga ni tigatigana.

“Bangkrut.” ninna jolma i manghata nasida. 

Sipata ingkon maradu godang ni modal do tutu na martigatiga on, ala olo marsidabuhon arga asa sega alona. Molo motip (parmodal tipis), gadap ma i so margellok. Ujungna gabe martukkangtukkang ma Ama ni Pardomuan, dang martigatiga be nasida.
 
Dung so martigatiga be nasida, jala gabe martukkang Amani Pardomuan, holan na monggop di jabu ma Nai Pardomuan ala so adong be ulaonna. Alai dang sonang rohana, dipungka ibana ma manuan sanggesangge di tano parjabuan ni jolma di hambirang jabu nasida i. Nda dohonon antar bolak dope tano na marisuang so dihahua di huta nasida, Rambung Merah tingki i.

Dang marnaloja Nai Pardomuan. Ganup ari sai dipabolak ibana do manuan sanggesangge di humaliang jabu nasida i dung dipangidohon tu angka partano na tarulang disi. Sipata olo do mengkel suping Amani Pardomuan molo diida ibana bolak ni parsanggesanggean ni naniolina i. Alai dapot do dilapati ibana i, ala sian na marbaju pe Nai Pardomuan muba do padotna mangula, alani do asa tubu holongna tu parsonduk bolonna i .

“Holan uapna i laho padao rongit pararon do sanggeangge on.” ninna Nai Pardomuan tu jolma i molo disungkun tu aha suanonna songon i bolakna sanggesangge.
 
“Ianggo holan allangon do, holan di toru ni pamispisan ni jabu i pe so hasudaan be i. Suda gogo, suda ariari, sude tano tarulang suananmu sanggesangge.” Ninna donganna ina tu Nai Pardomuan.

Dang sumurut antong Nai Pardomuan, porsea do ibana mansai ringkot do sanggesangge. Padao rongit, asa dao ulok sian jabu ala nunga ias humaliang, jala lakku do muse haduan i gadison tu angka parruma makkan dohot parkatering, ninna roha ni Nai Pardomuan.

Onom bulan dung disuan Nai Pardomuan sanggesanggena i nunga boi antong buaton, dang hinata napu ni tano Simalungun so pola i napuan. Dihunti ibana ma sanggeanggena i tu pasar pagi Parluasan tibu manogotna i. Amani Pardomuan ma marorot si Pardomuan paima so mulak inantana i, ai sanga do antong jolo mulak sian pasar pagi asa borhat ibana martukkang.

Hape ndang songon hinirim ni rohana ura lakku sanggesangge na binoanna i, ala godang do hape martigatiga sanggesangge. Alai ndang sumurut Nai Pardomuan, maringkon do rohana lakku sanggesangge sinuanna i. Asa ganup adong na mamolus sian jolo partigatigaanna i, dang marnaloja manang maila manggorai angka na mamolus i.

“Sanggesangge, sanggesangge on Eda.” Sai i ma dohononna, manang “Sanggesangge, sanggesangge Inang, bagakbagak jala angur, ura do argana, di hamu Eda?” 

Marlaba do loja ni Nai Pardomuan, ganup ari suda do sanggesangge binoanna i. Lam tamba ari tamba bulan lam torop ma mananda ibana dohot manuhor sanggesangge sian ibana. 

Dang hinata, molo taringot di arga so adong tolap mangalo ura ni sanggesanggena ala sinuanna sandiri do antong. Ndang songon partigatiga na asing na manuhor sian halak muse do asa adong gadisonna.

Alai na mambahen sai ingot jolma i tu Nai Pardomuan, na so olo mansadi i do ibana sai manise angka na mamolus sian jolo partigatigaanna huhut mandok:

“Sanggesangge, sanggesangge on Eda. Sanggesangge on Inang, ura do.”

I ma mulana gabe tarbarita ma Nai Pardomuan Parsanggesangge. Angka parruma makkan, parkatering, partigatiga di jabu, manang partigatiga Pajak Horas sian ibana nama manuhor sanggesangge. Sipata songon na so taradopi ibana be angka godang ni pangidoan sanggesangge sian angka panuhor. Ai dohot do nang sian Porsea, Balige, Kisaran, Tanjungbalai nang sian Pakanbaru Riau mangido sanggesangge sian ibana. Tarbarita ma Nai Pardomuan, Tokke Sanggesangge.

Dang holan sanggesangge sinuanna i be diboan ibana, ala so taralosa be pangidoan ni panuhor. Amani Pardomuan pe antong dang tarjuana so mansohot gabe partukkang, ala sai maringkon Inantana i ibana mandongani gabe tokke.

“Sadia upam sadari, hulehon pe i ganup manogot tu ho. Alai dongani ma ahu martigatiga.” ninna Nai Pardomuan mangasangi amantana i.

Sai rap dohot Amani Pardomuan ma ibana marbessa barang arianna i mandiori sanggesangge tu hutahuta humaliang. Gariada angka hombar jabuna pe nunga sude manuan sanggesangge di alamanna be manang di tano na tarulang humaliang huta nasida i. Tu Nai Pardomuan ma nasida manulak i molo dung boi gadison.

Taon marganti taon, si Pardomuan pe nunga adong tolu tinodohonna, sada baoa dua borua. Parngoluon nasida pe tahe nunga andul dao dumenggan, ia haru jabu nasida so inama bagakna jala bolakna na saladang.

Domu muse nunga manuhor motor pikkap (mobil Pick Up) nasida asa adong manarui barang nasida. Di kassa ni pikkapna i pe disurathon ma “Sanggesangge do mulana.” Keren ma tahe. 

Singkola ni anakna i pe sude denggan do, jala ture muse do pangalaho ni angka gellengna i.

Tarbarita ma tahe molo parsanggesangge, ndang holan di pasar pagi Parluasan. Sangap ma nang goarna ala ni suksuk ni arta nuaeng on. Haidahan do i molo laho Nai Pardomuan tu ulaon pesta manang mardalani. Ueeee hamuna jolo ingkon marsalon do i, horunghorung masna i pe sabalga ni sanggesange i ma alit di rungkungna. Golang masna pe dohot tintinna tung balga ma sabalga ni bona ni sanggesangge, ndang songon tipis ni bulung ni sanggesangge inon.

Songon i do tingki laho mangoli si Pardomuan tu siboru tinodo ni rohana, ala boru ni dongan na hansit do na naeng parumaenna i, tung jamot do dibahen Nai Pardomuan. Ala nunga marsihaholongan anakna tu na naeng parumaenna, mansai las do roha nasida, burju muse, lambok na naeng parumaenna i nang natorasna atik pe dongan na pogos. 

Las roha ni Nai Pardomuan tu na naeng parumaenna i. Ai marnida haburjuon dohot pangalaho do ibana, ndada mangida arta ni borua i manang amongna.

Diparade Nai Pardomuan do Mas horunghorung, sibong, tintin dohot golang mas na balga, sabalga ni bona ni sanggesangge i dilehon tu parumaenna. 

“Ndang olo ahu ho mamangke mas molo holan satipis ni bulung ni sanggesangge. Alai ingkon balga do, molo boi lobi sian balga ni bona ni sanggesangge tuhoronhu di ho. Ai so tu ise be i muse, tong nama laho di hamu nadua i poang. Ndang parsuma ahu tokke sanggesangge.” ninna Nai Pardomuan huhut manghaol gomos dohot mangumma na naeng parumaenna i. 

Sodap ma tahe Nai Pardomuan, marlaba do padotna dohot pos ni rohana mangulahon ulaonna. Gabe manghorhon nauli do i manambai pansamotanna ala puhut jala burju ibana mangulahon, tung pe di mulana i leas roha ni jolma mangida ibana. Dang tung ala rumang ni ulaon hape mambahen mamora jolma. Alai puhutna dohot burjuna nang pos ni rohana di ulaonna i do mambahen gabe hasea jolma i, ala nunut do mula ni sinadongan. 

Ia tung pe nuaeng nunga mamora ibana, alai ndada arta na manggohi rohana. Habengeton dohot burju ni pambahenan do suhatsuhat ni ngoluna.


Panggurit: M. Tansiswo Siagian

Post a Comment for "Torsa Sambolus, Tokke Sangge-sangge"