Puisi Cinta Batak, Au Na Tarhirim

AU NA TARHIRIM
Puisi Cinta Batak, Au Na Tarhirim
Tarsongon dakdanak na mauas na male
Naso dapot mangan di pesta adat ni na mangoli
Songoni ma nang au na marsak jala gale
Dung lao ho ito manadingkon au rap dohot sidoli i

Dang naso ra au manghaholongi ho
Dang naso mangantusi au di panghilalaanmi
Alai tung boasa ma hasian ingkon lao ho
Manadingkon au na sai tarhirim di holongmi

Paboa ma da hasian
Aha do alana umbaen na lao ho
Hatahon ma haholongan
Dia do bonsirna umbaen na muba ho

Molo adong na adong na sala na hubaen
Adong do dengganna molo hita marsisalpuan
Molo adong na hurang pambahenanhu hasian
Adong do dengganna molo hita marsisungkunan

Mulak ma ho hasian
Mulak muse tu ngolungki
Mulak ma hita marsihaholongan
Songon di ari naung salpu i

Molo mengkel ho
Mengkel ma nang au
Molo tarilu simalolongmi
Rade do au mangapus ilumi

Unang ma baen hasian
Di holongmi au sai tarhirim
Ditangiangku au marpangidoan
Au ma nian na gabe rongkap ni tondim


Puisi Cinta Batak
Oleh: Yunus Purba
Dolok Sanggul - Humbang Hasundutan, 28 Nov 2012

Post a Comment for "Puisi Cinta Batak, Au Na Tarhirim"